DE LANDKREIS LUDWIGSHAFE
Vum Könich Ludwig is bekannt,
was er gebaut - im Bayernland,
en Haufe Schlösser un so Zeich,
durch des sinn heit die Bayern reich,
obwohl se bis zum tragisch Enn
als uff denn Könich g'scholte henn.
Ich sag - es war en Mann - en brave,
weil er de Landkreis Ludwigshafe
durch Unnerschrift besiegelt hott:
Des war e gutie Tat - bei Gott.
Es sinn genau jetzt hunnert Johr,
do nahm er noch die Gründung vor
un hott - des werd jo jeder wisse,
paar Dag denooch versaufe misse.
Doch was er g'schafft hott - in seim Land,
ob Schloß - ob Landkreis - hott Beschtand.
In dere Zeit - mit voller Kraft,
do hott mer jo noch ann'res g'schafft,
denkt bloos an's Auto - liewe Leit,
des schtammt ach aus der Gründerzeit.
Was dort mer g'schaffe, war net schlecht,
ach unsern Landkreis is schun recht
un was zum Lewe heit duht not,
vum Duwak - bis zum däglich Brot,
bei uns gedeiht des - ohne Verz,
viel besser als wie annerwärts,
uff alle Fäll mol net geringer,
drum henn mer ach die schtärkschte Ringer
un lossen im Gewichte stemme
uns selten mol en Titel nemme.
Drum dankt dem Könich - der'n gegründ,
als letschter Wille 's noch verkünd',
er hott gebaut die schäne Schlösser,
jedoch sei ledschtes Werk war besser.
Un deht er lewe noch - in Münche,
er deht uns alles Gute wünsche,
doch weil er des jo nimmie kann,
wünsch ich's jetzt - for denn gute Mann.
Ach wann ich an de Weischtrooß wohn,
fühl ich mich als en Landkreissohn,
weil jeder Tremmel - insgesamt,
nadierlich jo aus Waldsee schtammt.
Ich wünsch - vum Haardtrand, aus de Rewe:
Dem Landkreis noch e langes Lewe!
Der Autor
Paul Tremmel aus Forst (Kreis Bad Dürkheim) gehört zu den bekanntesten Mundartdichtern der Pfalz und gilt als "Endreim-König". Mit den obigen Versen gratulierte er 1986 dem Rhein-Pfalz-Kreis, der damals noch Landkreis Ludwigshafen hieß, zum 100-jährigen Bestehen.