Ausgezeichnete Mundarttexte

STÄRWENSKRANK !? Doin Kopp, der is schwer,
es Hern is wie leer.
Die Knie die sin wacklisch,
de Gang is ganz gaklisch.
Es brennen doi Aache,
es flattert de Maache.
Doi Herz kannscht vergesse,
des rast wie besesse.

Kään Doktor kann helfe,
kä Fee un kä Elfe.
Do nitzen kää Troppe,
schun eher zwee Schoppe.

So isses moin Liewer
beim Lampefiewer!

6. Platz beim Mundartwettbewerb Dannstadter Höhe 1995

"O TANNENBAUM" ('S WEIHNACHTSBÄML)

's Weihnachtswunner, 's Kind im Stall,
die Hirte, die Engel, die Fräd - Iwwerall
war Fräd uf de Welt.
Des Tannebäml drauß im Feld,
im weißgfore Feld bei de schwarze Rawe,
als Weihnachtsreliggt do im Chausseegrawe.

Als Weihnachtsbom im Lichterglanz
so ewig glückselig. Ganz
plötzlisch war's aus.
Viel zu früh hot's müsse naus.
Wie's duschder werd, fließen bittere Träne,
- wie gern hätt's noch die drei Känige g'sähne.

Die Nacht kummt, dunkel, eisigkalt,
un Angst un Verzweiflung, Un sachte fallt
Mondlicht ins Loch.
Millione vun Sterne glänzen hoch
am Himmel un leichten nunner.
Un's Bäml funkelt... 's Weihnachtswunner.

Die Sunn schickt mühsam Lewe ins Feld
's Bäml streckt sich verzweifelt ... Die Kält
verschwindt.
De Wind
streichelt sanft des Geglitzers noch runner.
Des is net nötig fer's Weihnachtswunner.

Un die Weihnachtsmaschin gibt längscht widder Gas,
de Mensch hot se umgstellt. "Osterhas"
verlangt jetzt die Zeit.
Geschdern war geschdern, heit
is heit hot de Wind schnell de Schneesturm geweckt.
Un der hot des Bäml dann zugedeckt.


2. Platz beim Mundartwettbewerb Dannstadte Höhe 1996

NORRE SO WERD'S BESSER

En jeder hot schun noochgedenkt
wie mer die Welt veränn're kennt.
Denn es is manchmol schun recht bleed,
was in de Zeitunge drinn schteht.
Also, was kännten mer all du,
damit die Welt mol käm zur Ruh?

Es gäb do dausend klääne Dinge,
die bissel Frääd ins Lewe bringe.
Mer braicht dezu e bissel Glick,
kä Obrichkeit un Boledik.
Zum Beschpiel Singe odder Lache,
des kännt schun vieles annerscht mache.

Schlecht is, zu retsche iwwer'd Leit.
Net määne, mer is b'sunnerscht g'scheit.
Mol wennicher rumdischbediere.
Sich ruhich mol bissel angaschiere.
Net iwwer alles sich beklache,
dann kännt mer jo die Welt ertrache.

Wer dut schun alles besser wisse?
Wichtich is a e gut Gewisse.
Efters ganz fescht soi Mänung sache
un ruich Verantwortung getrache.
Vielleicht net immer zammeraffe,
dann kännten mer's tatsächlich schaffe.

Mer muß net immer Erschter soi.
Un denk net, ich bin viel zu foi.
Fallt der a 's Ruhichsoi alsmol schwer,
kehr erscht vor deiner eichne Deer.
Beizeite als die Schnut mol g'halte,
dann hett die Welt kä Sorchefalte.

Verhalt Dich niemols iwwerzwerch
Geh hie un widder in die Kärch.
Als mol dro denke, 's is kä Schann,
daß mer net ewich lewe kann.
Jach net fortwährend nooch em Geld
Dann wer's viel schänner uff de Welt.

Mer sollt net iwwer alles schenne,
Erscht mißt mer's besser mache kenne.
Mol u'gfrocht helfe in de Not
zur Seit schtäh, mit em gute Rot.
Un sich benemme, wie sich's g'hert
Dann wer die Welt a liewenswert.

Wer heflich is, geht niemols unner.
E freindlich Wort wirkt manchmol Wunner.
Net alles uf die Annre lade,
E bissel Ricksicht det net schade.
Un fiehrt mer noch e gaschtlich haus,
dann sieht die Welt schun annerscht aus.

Hett mer e bissel mä Humor,
käm manches lächerlich äm vor.
Un es dät garandiert net schade,
die Nochber als mol oizulade
un sich mit ihne gut verschteh,
dann wer die Welt jo schunn oke.

So gebbt's noch massisch Klänichkeite,
die jedem vun uns Frääd bereite,
wammer halt werklich kunsequent
des in die Tat umsetze kennt. -
Ich wäß, die Rotschläch hänn känn Sinn,
wann ich net bei mir selbscht beginn.


Sonderpreis des Kultur- und Heimatkreises Dannstadter Höhe e.V. 1997